Toni Pacati

Soita musicheta del caolo,
la dovaria essare na tocata e fuga ma... dixemo che la xe na' gran porcarìa de rumore, fato da un teèfono vecio de 7 ani, ma par fortuna chel xe bèo forte... cossì no coro el rischio de no' sentirlo.
Vedo el nome de chi me ciama. A voria quasi no' rispondare. Sì sì, l'è proprio el me amigo.
Sì queo che saria ben no' avere par amigo.

"Pronto"

"Ciao, tuto ben?"

"Ciao vecio, tuto ben grasie. So un fiatin de corsa"

"Sì sento che te pantèsi"

"Xe vero, in sti giorni no' faso altro che corare"

"Scoltame... Mercore sarisito libero?"

"Ma, vedemo? Me pare che pae do... anca un fiatin prima... sì podaria esare libero"

"Ben eora se vedemo Mercore che go da parlarte..."

Mi eo so xa cossa chel gà da dirme,
el voria che eo iutasse un fiatin par fare poitica!

Se se.. poitica mi? Ma se ea gò sempre ciapà in chel posto, parcossa xe che i insiste uncora par metarme in mexo aea poitica?

Epure me piaxaria tanto farla, quea bèa, quea che se lavora solo pa i altri... a gratis!

E invesse.

Che in poitica se veda de tuto se sà benisimo.

E voria anca vedare, tuti sa tuto de tuti,

no ghe xe speransa par nisuna e ogni volta che cualcuno alsa ea testa...

ZACCHETE

Me gavì capìo... vero?

Quando che go verto stò blogghe no gavaria mai pensà che eo gavaria assà perdare.
Iero convinto de tegnerlo agiornà almanco na volta ogni do dì e magari de metare in piè 'na combricoea che gavesse voia de perdare tempo. Sì perdare tempo ma faxendo qualcossa.
Isoma, no pensava proprio che me gavaria stufà cossì presto de dire ea mia.

E dire che questo el iera partio co un saco de entusiasmo.

E dire che ogni volta che scrivo in tel giornae ea xente me fa un saco de complimenti, parchè scrivo sensa pei in tea lingua.

Massa diffisie xe lesarme.

Massa diffisie xe trovarme.

Ma no me ne frega niente.

Gavevo voia de sarare 'sto spassio ma... a momenti me sbagliavo!

Tegno duro e, magari, me impegno un fiatin de più.

Quante volte ve xe capità de dire: "Mi, al so posto, gavaria fato..." opure "Mi? Ma gnanca par idea..."

Se se se... a paroe semo tuti boni de fare, a fati invesse NO!

E no stè credare, me capita anca a mi, sebèn che no vorìa, sebèn che me piasarìa fare de tuto par essare bravo e bon co tuti.

Ma ve conto stà storia, che magari no ve intaressarà par gniente, o magari no eà capirè gnanca mai, ma gò voia de scriverla, parché in qualche modo voria domandare scusa a tuti, parché davero no stago ben, parché vorìa essare vossudo ben par quéo che sò e no par quéo che podarìa essare.

"Iero in tel casin pì grosso che me podeva capitare, davanti na vecia che me vardava de continuo, in fianco invese gavevo na creatura beissima che me faseva de moto che eà gaveva bisogno de mi.
E mi? Cossa podevoi fare? Sì voevo iutarla ma no podevo. Intanto el tempo passa, mi iero drio scrivare co eà man sanca e co l'ocio san vardavo se podevo fare qualcossa par... par ela (mbhè capìme dai).
Ma davanti gavevo uncora el falco... eà gavarìa impenìa de paroe ma no gavaria servisto a gnente.
E mì me sentivo sempre pì un mona, in te 'na situassion che podevo sistemare e che invesse no savevo par come girarla.
Aaaaa Toni Toni, me disevo in siensio, cossa poito fare desso?
Come se no bastasse gavevo scumissià a sentire i mormorii de queo de drìo.
Capivo che l'unico modo par cavarme da stà storia eà iera quea de batere in ritirata. E cossì go fato, che verme!
So 'ndà via! Eà go assà da sola in meso al sò casin."

E proprio par questo mi me sento come queo che xe meio no avere mai come amico.
Mi so proprio eà peso persona che se possa incontrare, anca se con toni pacati, no ve auguro mai de incontrarme.
E no vegnime a dire che voialtri si diversi da mi! No ghe credo, no ghe credo pì a nissuna.

Se ghe xe qualcossa al mondo che me fassa deventare mato i xe proprio i me putei.
I xe dò. Uno el fa ea prima, ve eo gavevo xà dito, e 'naltro el fà l'asilo.
Che beo che xe rivare casa e sentirli xugare.
Co lori parlo poco, no gò tanto tempo pa stare in sieme, mi parto ala matina ae siè e tre quarti, e rivo casa ae nove deà sèra.
"Ciao Papi..." un baseto, e dopo mi a tola, par magnare, e lori in leto, par dormire.
'Na roba che me piase tanto xe 'ndare in leto con lori e parlare un fiatin.
Vien fora tuti i pì bei stramboti che uno possa sentire. E sò cossì contento da no sentire pì tuta eà stanchessa del giorno.
"Basta... xe ora che i putei dorma..." Me urla drio me muiere.
E mi, me also. Ghe dago un baseto in fronte a tuti dò. Vago fora dala camereta. "Bona note" ghe digo.

"Buona notte papi." i me dixe.

Possibie che gnanca stà volta no i sia sta' boni de metarse d'acordo prima. E a farghene e spese semo sempre noialtri pori ebeti che no se lamentemo mai. Forse pensè che sia deventà mato, ma no ea xe cossì, so drio lamentarme dee curiere. Gavio mai provà a ciaparghene una? Tuto ben se ea ciapè in agosto, ma gnanca pesarghe se gavì bisogno de 'ndare in giro quando che e scòe ga cumisià. Intanto ve toca restare in piè, pasiensa, dopo ve toca ciamare parchè qualcuno se sposta, masa fadiga pa i altri spostarse pi in là che cossì ghe starisimo anca noialtri, ma tute e volte che me vien in mente che doman matina go da ciapare ea curiera pa' 'ndare a lavorare me vien el magon parchè no xe posibie che gabia da stare soto a chei quatro snarociosi che xe boni soo de scaldare el banco, parlare mae e sporcare ea curiera. No ve digo quando che qualchedun gà da smontare, se no se stà atenti i te copa. Tuti ga freta ma freta de cossa no capisso. Ea xe 'na guera sempre. Me piase quando che leso el giornae e vedo che saria meio ciapare i "mezzi pubblici" parchè se inquina manco e se fa manco trafico, ma come se fa fidarse de 'ndare in giro scomodi e col pensiero che ea curiera ghe sia par davero. Posibie che tute e volte che taca esarghe bisogno davéro de sto servisio publico, ghe sia ancha i scioperi che rompe i piani? Ma no i podeva metarse dacordo prima? Parché go da stare a pié proprio mi che no go mai fato del mae a nessuno? Se veramente ciapare e curiere saria un ben par tanti motivi, no capiso parché se penaiza sto servisio. No se podaria miga fare in modo chel funsionase ben in modo che eo ciapassimo tuti sensa avere ea preocupasion de savere se ghe xe posto o se par caso ea tira drita come che sucede tante volte? Mi, come tanti altri, saria pronto a pagare anca qualcossa de più se savese che e robe tacase funsionare, ma sicome che cambia i sonadori ma ea musica ea xe sempre ea stesa, in te sto modo so xa drio pagare massa. Gavaria anca qualche idea in testa ma go paura che no me daga reta nesuno, come che sucede sempre, eora stago sito e me tegno e robe che no và. No saria giusto ma visto che tuti fa cossì eora me adato. Saria beo invese che in coriera se podese entrare soeo se davéro se paga, che se podese ciapare chi che sporca e far smontare chi che se comporta mae, saria beo vedare ben dove che ea coriera va capindo subito se ea pasa par Maserà o se ea xe quea che fa naltro giro, saria beo che se podese ciapare ea curiera anca pa ndare dove che desso no xe posibie, ghe ne manca tanti de paesi che no xe ben servii costrinsendo tuti a movarse co ea machina. Disighe pure a quei che pensa de risolvare tuto col tram, che ea xente normae ciapa ea machina parchè co i altri mezi saria soeo che un problema in più. El tram bisognaria farlo pa coegare i grossi centri fora Padova. Eo so che xe masa fasie parlare co ea boca ma quanto meio saria se ghe fusse ea possibiità de girare pa ea provincia in poco tempo e sensa el pensiero de dove metare xo ea machina? Mi voria domandarghe na roba a serti poitici: "Ve sio mai mesi daea parte de ea pora xente? De quei che va lavorare pa ciaparse da vivare? Se fusse vero eora parchè dopo tanti anni no semo mai boni de trovare un modo pa farne spostare sensa ingorgare tanto e strade?" Se almanco i ghe provase bastaria manco curiere e manco trafico pa ndare a lavorare. Penseghe!

Go pena porta el me picolo a scola.
No ve digo che emossion, no ve digo che ea tremarèa me iera vegnu ancha a mi.

Sì, me vien in mente quando che a scola me gaveva porta me mama.
El me primo giorno... me ricordo che ea iera na giornata de sole, tuto beo, iera bea anca eà me cartea.
Me mama eà gaveva na facia dura imusonà, no go mai capio parché, me popà... bho, no me ricordo tanto ben, sò che el me ciamava "Remigino" ma no capivo parché,
Entrando a scola go visto Sergio, el bideo, e Dorina, eà bidea.
'Ndando vanti me mama me gà portà davanti eà classe dove che ghe iera xà dei altri toseti, come mi.
Eco che i me passi i iera un tantin insicuri, no savevo ben cosa fare, me mama me spinseva, e mi ea vardavo come par capire qualcossa dai so oci, sì i oci de me mama, proprio chei bei oci che tuti ga sempre nominà, chei ocieti celesti, fineti, grasiosi. A tuti ghe piaseva i oci de me mama ma... a mi, in chel momento, i me serviva par capire cossa che dovevo fare. Ma no riussivo a capire niente e... e 'eora me sò girà, gò messo un passo davanti staltro, me sò messo vardare vanti e gò visto tuto, sì go capio, gò visto i oci de eà me maestra. Oci scuri ma grandi. Pareva che i me ciamasse par nome, che beo, ea me maestra eà me voeva xà ben, eò go capio subito. Che soriso, sì gò capio che dovevo 'ndare vanti.
Me sò sentà davanti, se gà sarà e porte, xe scumissià ea scola.

Al me puteo ghe restarà altri ricordi, altre robe, chissà cossa che ghe ga colpio de più.
Spero tanto che ghe piaxa studiare, ma eò sò el xe bravo, spero chel se comporta ben, ma l'è bravo sichè no go da preocuparme.
Gò proprio un gropo in gola. Ghe voio tanto ben al me putèo.